O Ourense Film Festival (OUFF) e a súa entidade organizadora teñen o firme compromiso de garantir unha contorna segura, respetuosa e inclusiva para tódalas persoas involucradas no festival, xa sean traballadores, participantes ou convidados. Cremos na importancia de fomentar un espazo libre de calquera forma de discriminación, acoso ou conduta que vulnere a dignidade e os dereitos das persoas.
Como parte dos nosos valores fundamentais, no OUFF non se tolera ningún tipo de discriminación baseada na idade, sexo, raza, cor, crenzas, idioma, identidade e expresión de xénero, orientación sexual, procedencia xeográfica, discapacidade física e/ou intelectual, orixe social, nacional ou étnico, estado de cidadanía, estado civil ou calquera outra condición persoal. Comprometémonos a garantir que todas as persoas sexan tratadas con respecto, igualdade e dignidade en todas as actividades relacionadas co festival.
Ademais, condenamos firmemente calquera forma de acoso, xa sexa laboral, sexual ou de calquera outra índole. Promovemos unha cultura de respecto e confianza onde cada persoa se senta segura para expresarse sen temor a represalias ou situacións que comprometan o seu benestar.
O OUFF adhírese a principios de equidade, diversidade e inclusión e espera que todas as persoas e entidades involucradas no festival actúen en consonancia con estes valores. Calquera comportamento que atente contra estes principios será considerado unha falta grave e dará lugar ás medidas correspondentes.
Reafirmamos o noso compromiso de seguir traballando para construír un festival que sirva como un espazo de convivencia e respecto mutuo.
Obxectivo principal
Este código ten como obxectivo primordial garantir unha contorna segura, respectuosa e accesible en tódalas actividades organizadas polo OUFF, tanto aquelas abertas ao público como as que son exclusivamente da organización. Os principios de respecto, igualdade, diversidade, inclusión e transversalidade son os piares fundamentais que guían todas as accións e relacións dentro do festival.
O código aplícase a todas as persoas involucradas no festival, xa sexa en calidade de traballadoras, organizadoras, colaboradoras, participantes ou invitadas. Ademais, o seu alcance esténdese a calquera individuo ou entidade que participe en actividades ou preste servizos relacionados co festival.
Deste xeito, o cumprimento destes principios é indispensable para o bo funcionamento do OUFF, promovendo un ambiente no que todas as persoas poidan desenvolver as súas actividades de maneira segura, sen discriminación nin exclusión de ningún tipo.
Contorna segura
Todo incidente relacionado con acoso, discriminación ou calquera conduta inapropiada será tratado coa máxima seriedade, asegurando que nunca se subestime a súa gravidade. Calquera denuncia será investigada de maneira dilixente e conforme aos protocolos establecidos que rexen o festival. Estes protocolos deberán ser de coñecemento obrigatorio para as persoas que participen, directa ou indirectamente, no evento, garantindo que todos comprendan a importancia de seguir as normativas e procedementos correspondentes.
Contorna accesible
O OUFF e a entidade que o organiza están firmemente comprometidos coa creación dun espazo inclusivo e accesible para tódalas persoas, sen importar o seu xénero, orientación sexual, orixe, condición física, sensorial ou cognitiva.
Co obxectivo de garantir unha participación equitativa e libre de barreiras, o festival implementará medidas de accesibilidade específicas en tódolos seus ámbitos. Estas accións estarán orientadas a facilitar a participación plena das persoas, promovendo un ambiente onde a igualdade, o respecto e a diversidade sexan os valores que rexan todas as actividades e espazos do evento.
Este compromiso reflicte a vontade de crear unha contorna que non só sexa accesible, senón tamén acolledora para tódalas persoas, sen distinción algunha, permitindo que cada persoa poida gozar e contribuír ao festival sen obstáculos.
Transparencia
O OUFF e a entidade que o organiza comprométense a proporcionar información clara, accesible e actualizada en relación cos temas de acoso sexual, laboral e/ou discriminatorio, así como sobre os protocolos de prevención, actuación e denuncia establecidos.
Esta información será posta ao dispor de tódalas persoas involucradas no festival, xa sexa en calidade de traballadoras, organizadoras, colaboradoras, participantes ou invitadas. O obxectivo é garantir que todas as persoas teñan acceso aos recursos necesarios para actuar de maneira informada, asegurando unha contorna segura, inclusiva e respectuosa para todos.
Ademais, o OUFF levará a cabo accións de sensibilización e formación destinadas a previr calquera tipo de violencia, acoso ou discriminación. Estas iniciativas buscarán fomentar unha cultura de respecto, igualdade e diversidade en todas as actividades e espazos do evento, promovendo o benestar de todas as persoas participantes.
Compromiso e cooperación
O OUFF reafirma o seu firme compromiso de crear un evento no que todas as persoas poidan gozar, participar e expresarse libremente nunha contorna segura, accesible e completamente libre de calquera forma de violencia ou discriminación. Este compromiso esténdese a todas as actividades, garantindo que cada individuo, sen importar a súa condición, poida sentirse parte dunha experiencia inclusiva e respectuosa.
Así mesmo, o festival promove a cooperación como unha ferramenta esencial para maximizar o impacto das súas accións. A través da colaboración entre todas as persoas participantes, así como entidades organizadoras e colaboradoras, o OUFF busca xerar cambios estruturais que vaian máis aló do evento, contribuíndo á construción dunha sociedade máis xusta, equitativa e inclusiva.
O compromiso do festival coa cooperación non só busca mellorar o seu propio funcionamento, senón tamén inspirar un cambio positivo e sostible na comunidade, deixando unha pegada duradeira na cultura e nas persoas involucradas.
Se queres máis información, podes consultar o Protocolo para a garantía dunha contorna segura, inclusiva e respectuosa no OUFF.
