- Esta actividade lúdica, con entrada de balde, é unha das novidades desta edición de 2026 no OUFF.
- A proxección da aclamada película Fantástico Sr. Fox terá lugar o 30 de xullo nun horario concibido para toda a familia e contará cunha zona habilitada para quen desexe asistir coa súa mascota.
Dende o OUFF · Ourense Film Festival (OUFF) sumamos unha nova e orixinal proposta á nosa programación estival: unha noite de cine de verán ao aire libre na que se proxectará a celebrada película Fantástico Sr. Fox.
A cita, con entrada gratuita e ata completar o aforo dispoñible, celebrarase o vindeiro xoves, 30 de xullo, de 22:00 h a 23:30 h, na terraza superior do Centro Comercial Ponte Vella. Trátase dun horario moi accesible e pensado para facilitar a asistencia de familias con nenos e nenas, permitindo ao mesmo tempo finalizar a unha hora razoable para respectar o descanso veciñal sen renunciar ao ambiente festivo das noites de verán.
A iniciativa propón unha experiencia cinematográfica aberta para toda a cidadanía nun espazo amplo, cómodo e ao aire libre. Como novidade e de xeito pioneiro, o evento contará con unha zona especialmente habilitada para aquelas persoas que desexen acudir xunto coas súas mascotas, garantindo en todo momento o benestar, a comodidade e a boa convivencia de todo o público asistente.
Esta actividade é posible grazas ao traballo conxunto do festival e á colaboración do Centro Comercial Ponte Vella e a empresa local Estrellas & Huellas.
Sinopse de Fantástico Sr. Fox
Fantástico Sr. Fox (2009) é unha aclamada obra de animación stop-motion dirixida por Wes Anderson e baseada no clásico de Roald Dahl. A historia segue as aventuras do Sr. Fox, un raposo astuto que leva unha vida apacible xunto á súa familia tras deixar atrás os seus días como ladrón de galiñas.
Porén, o seu vello instinto salvaxe reaparece e decide planear un último e ambicioso golpe contra os tres granxeiros máis malvados e roñosos da rexión: Boggis, Bunce e Bean. Cunha estética visual marabillosa, humor intelixente e moito corazón, é unha comedia divertida, perfecta para públicos de todas as idades.
Recomendacións do festival para a asistencia con mascotas
Desde a organización do festival queremos salientar unha serie de pautas básicas de convivencia para garantir a comodidade do animal e a boa marcha do evento na zona habilitada para mascotas:
- Valoración do benestar do animal: ao tratarse duna proxección ao aire libre, o volume do son e a pantalla poden ser máis intensos do habitual. Recoméndase ás persoas responsables valorar previamente se a súa mascota se atopa cómoda en entornos concorridos ou ruídos elevados.
- Uso de correa e control: dentro do recinto, as mascotas deberán permanecer atadas con correa e baixo a supervisión constante dos seus responsables en todo momento.
- Elementos de confort: aconséllase levar unha almofada ou mantiña para que o animal poida descansar comodamente sobre o chan da terraza durante a proxección.
- Hidratación e alimento: é recomendable acudir con auga fresca e snacks para manter a mascota hidratada e tranquila ao longo da velada.
- Hixiene e limpeza: cada persoa será responsable dos residuos do seu animal, sendo obrigatorio recoller os seus desfeitos e manter o espazo limpo para o desfrute de todos os asistentes.
Datos clave do evento
- Data: xoves, 30 de xullo.
- Horario: de 22:00 h a 23:30 h.
- Lugar: terraza superior do Centro Comercial Ponte Vella (Ourense).
- Película: Fantástico Sr. Fox (Wes Anderson, 2009).
- Entrada: libre e de balde ata completar aforo (con zona reservada para asistentes con mascota).
- Organizan e colaboran: OUFF, Centro Comercial Ponte Vella e Estrellas & Huellas.
