-
A célebre actriz galega, recoñecida pola súa brillante traxectoria no teatro, o cinema e a televisión, recibirá o galardón durante a Gala de Inauguración do festival.
-
A distinción seralle entregada pola delegada de AISGE en Galicia, Isabel Blanco, o vindeiro venres 25 de setembro no Auditorio Municipal.
Dende o OUFF · Ourense Film Festival e a Fundación AISGE facemos público o outorgamento do Premio Honorífico AISGE desta 31ª edición á actriz galega Uxía Blanco. Con este galardón, recoñecemos o talento, o compromiso e a traxectoria dunha das figuras máis queridas e respectadas da nosa interpretación.
O director artístico do noso festival, Óscar Doviso, salientou durante o anuncio a importancia da premiada para a historia do noso audiovisual: «Uxía Blanco conta cunha carreira brillante no teatro, na televisión e no cinema, onde encarnou o nacemento do audiovisual galego moderno ao protagonizar Sempre Xonxa en 1989. É un verdadeiro orgullo para o festival renderlle este merecido tributo».
Unha figura imprescindible da nosa cultura
Uxía Blanco forma parte da memoria colectiva de Galicia desde que deu vida a Xonxa en Sempre Xonxa (1989), a emblemática primeira longametraxe de ficción rodada en galego, dirixida por Chano Piñeiro. A partir dese fito, a súa carreira desdobrouse nunha sólida e versátil filmografía con títulos destacados como A lei da fronteira (Gerardo Herrero), Sei quen es (Patricia Ferreira), Días de voda (Juan Pinzás), Hotel Tívoli (Manuel Martín Cuenca) ou 18 comidas (Jorge Coira).
Na pequena pantalla, Blanco converteuse nun rostro indispensable para o público grazas á súa participación en algunhas das series máis históricas e exitosas da Televisión de Galicia, entre as que destacan Mareas vivas, Rías Baixas, As leis de Celavella e Valderrei.
O premio seralle entregado oficialmente pola delegada de AISGE en Galicia, Isabel Blanco, no transcurso da Gala de Inauguración do OUFF 31, que terá lugar o vindeiro venres 25 de setembro no Auditorio Municipal de Ourense.
